Bjarnarblogg

Fluttur

2010-02-06T15:29:00.002Z

Ekki að hér hafi verið annað en jólapóstar og 6.feb póstar í rúmt ár, en ég er fluttur.
Þar er árlegur póstur þessa dags, og vonandi meira fljótlega.

Gleðileg jól!

2009-12-25T18:40:00.002Z

Svolítið síðbúið, en:
Bjarnarbloggið og aðstandendur óska lesendum, vinum, kunningjum, inndetturum, fastagestum, hnýsnum persónunjósnurum og öðrum öðlingum
Gleðilegra jóla
Kærleiksríkrar Kristsmessu
Ljómandi ljósahátiðar (viku of seint)
Kraftmikils Kwanzaa
Heillandi hátíðarhvaðahátiðar (mega Vottar lesa blogg?)
Furðulegs Festivus
og almennt
Gleðilegrar, hamingjuríkrar, afslappaðrar, fjölskylduvænnar (ef við á), gjafaríkrar (sælla er að gefa en þiggja og hver vill ekki að náunginn njóti sælu?), matarmikillar og ljúfrar hátíðar!
Sol Invictus rís enn á ný!
og ekki má gleyma, eins og ég gerði í fyrra hinum árlega jólasveini:

6. febrúar 1958

2009-02-06T07:03:00.002Z

They shall not grow old as we that are left grow old
Age shall not weary them, nor the years condemn
At the going down of the sun, and in the morning
We will remember them

Geoff Bent. Roger Byrne. Eddie Colman. Duncan Edwards.
Mark Jones. David Pegg. Tommy Taylor. Liam Whelan.
The Flowers of Manchester

Gleðileg jól

2008-12-24T11:04:00.002Z

Bjarnarbloggið og aðstandendur óska lesendum, vinum, kunningjum, inndetturum, fastagestum, hnýsnum persónunjósnurum og öðrum öðlingum
Gleðilegra jóla
Kærleiksríkrar Kristsmessu
Ljómandi ljósahátiðar
Kraftmikils Kwanzaa
Heillandi hátíðarhvaðahátiðar (mega Vottar lesa blogg?)
Furðulegs Festivus
og almennt
Gleðilegrar, hamingjuríkrar, afslappaðrar, fjölskylduvænnar (ef við á), gjafaríkrar (sælla er að gefa en þiggja og hver vill ekki að náunginn njóti sælu?), matarmikillar og ljúfrar hátíðar!
Sol Invictus rís enn á ný!

Taj Mahal eða ekki Taj Mahal

2008-12-10T06:23:00.003Z

Það er eins og að sparka í liggjandi mann, en þessi mbl.is vitleysa er svo skemmtileg að ég hreinlega verð.
Indverjar eru eina ferðina enn farnir að ásaka kortagerðarmenn um hryðjuverk og er það í sjálfu sér ekki í frásögur færandi. Við fréttina er sett þessi líka ágæta mynd sem skv blaðamanninum sýnir "Taj Mahal hótelið í Mumbai séð úr Google Earth forritinu". Fyrir hvern meðalgreindan nörd sem bæði hefur séð myndir af hótelinu og... tja, öðrum stað tekur um 1,2 sekúndur að fara að hlæja.
Sömu loftmynd má sjá hér, nú eða að leita að 'Taj Mahal' á Google og breyta yfir í 'satellite'.
Auðvitað er þetta hið eina sanna Taj Mahal hof.
Nú spyr ég: Er ég of kröfuharður um almenna greind og þekkingu blaðamanna þegar ég segi að svona hlutir eigi hreinlega ekki að koma fyrir, þar sem þetta er þvílík fávísi að hálfa væri nóg? Er spurningakeppnisnördinn í mér of grimmur við blaðamanninn?

Ég sagði ykkur það, Obama er næsti forseti

2008-11-05T03:59:00.001Z

Ég spáði þessu sem möguleika fyrir nákvæmlega fjórum árum síðan.

Allt er nýtt

2008-10-26T20:33:00.003Z

Ekkert er meira viðeigandi nú en besti teiknimyndarammi allra tíma

Hvílík vitleysa

2008-06-19T20:50:00.000Z

Verð nú bara að biðjast afsökunar á síðustu færslu, hversu mikið bull var þetta. Portúgalir voru þeir sem voru með slaka vörn, arfaslakan markmann og bitlausa sókn. En núna getur Ronaldo a.m.k. ákveðið sig hvar hann vill spila næsta vetur.

Hraði gegn seiglu

2008-06-19T18:28:00.002Z

Ég er á móti því að kalla það svo að alvaran hefjist ekki fyrr en í fjórðungsúrslitum enda hafa verið úrslitaleikir síðustu fjóra daga í lokaumferðunum, en það er samt svo að nú fer hjartað að slá hraða.
Nú eru það Portúgalir sem munu þurfa að nota allan sinn hraða og spil til að vinna á Þjóðverjum. Þjóðverjar hafa oft verið með betra lið og nú held ég að veilur í sókn, vörn og markvörslu eigi eftir að segja til sín. Þetta verður samt ekki meira en eitt-núll fyrir Portúgal.

Gleðilega þjóðhátíð

2008-06-17T12:06:00.002Z

Til hamingju með daginn!
Hefur verið betra veður á 17. júní? Þori varla, nenni varla í mannmergðina sem verður í bænum, það er komið nægilega mikið af pallsklæðningunni til að ég get setið úti og sólað mig. Held að ég nýti það bara.
Í kvöld eru síðan viðeigandi stórleikir, nenni varla að bera stóra hlunkinn upp úr svefnherberginu til að geta ekki séð báða... og þó. Holland tekur þetta og Ítalía flýtur með.
Að lokum er rétt að benda á að þetta er hið Eina Sanna Bjarnarblogg. Annað er bara píp

Skróp

2008-06-12T06:44:00.003Z

Skrópaði að spá í gær, ætlaði að endurskoða spána sem ég gerði fyrir keppni m.t.t. úrslita til þessa, en kom mér ekki að því, enda í útréttingum og missti svo af Tékklandi - Portúgal. Það er ekki hægt að segja að Sviss hafi verið sérlega óheppið í gær að tapa, hefði svo sem alveg getað farið betur, en liðið er ekki betra en þetta. Held að Tékkar taki Tyrki og komist áfram, þannig að riðillinn fari alveg eins og ég spáði.
Í kvöld detta hinir gestgjafarnir út, ætla samt að endurskoða þrjúnúll sigur Póllands niður í eitt núll, jafnvel gæti þetta orðið jafntefli, en það nægir hvorugum, a.m.k. ekki þegar upp er staðið. Síðan vinna Þjóðverjar verkamannasigur á Króötum, eitt núll líka.
Er annars einhver hissa á því núna að Scolari hafi ráðlagt Ronaldo að fara til Real? Upp komast svik um síðir og Ronaldo sér vonandi ráðleggingar Stóra Phil sem það sem þær eru, tilraun til að losna við hann úr ensku.
Annars er allt að ganga vel í stóra pallamálinu, var reyndar kannske aðeins of bjartsýnn um tíma, en þetta er allt að koma. Myndirnar eru á facebook, hendi einhverju inn á undo myndasíðurnar fljótlega.

Seinn til

2008-06-10T20:19:00.001Z

Seinn til í dag, ekki fór alveg eins og ég spáði, Rússar aðeins sprækari þannig að 3-0 spáin var röng. Núna hins vegar eru Svíar að reka 2-0 spá mína fyrir Grikki öfuga ofan í kokið á mér. Ég kvarta ekkert undan því.

Snemma heim

2008-06-09T16:04:00.001Z

Kominn snemma heim, sem ég ætla þó ekki að gera oft, rétt í tæka tíð til að henda inn spánni:
Rúmenía - Frakkland 2-1
Holland - Ítalía 0-2
Held að Hollendingar muni valda mér vonbrigðum, en mun þó styðja þá þó þeir komi ekki til með að spila fínan bolta.
Hvað er annars málið með allita búninga?? Portúgalir í rauðum buxum og Frakkar í bláum?? Er nauðsynlegt að hafa það mikinn mun á brókunum að hvítt og gult sé of líkt?

Loksins þegar maður spáði 1-0...

2008-06-08T20:32:00.002Z

...plantar Podolski tveimur. Ekki ósanngjarnt, ekkert framúrskarandi, bara þýsk seigla, og slök pólsk vörn. Hlakka ekkert ofboðslega til að sjá Þýskaland - Króatíu.

Aftur og nýbúinn

2008-06-08T17:49:00.002Z

Afskrifað heimalið gegn mun sterkara Austur-Evrópuliði og aftur mega hinir síðarnefndu þakka fyrir nauman sigur. Svo er bara spurningin, er það vegna þess að Austurríki er sterkara en búist var við eða Króatar slakari. Hallast að hvoru tveggja (úffff þarna var næstum komið jöfnunarmark á 93. mínútu sem hefði eyðilagt færsluna) og að hvorugt liðið eigi eftir að ríða feitum hesti frá rest. Barátta Austurríkismanna þó einstaklega góð, en bætir ekki upp bitleysið.

Næstum þv

2008-06-08T13:56:00.003Z

Var tilbúinn í gær að biðjast afsökunar á að spá svona mörgum mörkum, aftur, en Portúgalir náðu að bæta við þannig að ekki var ég of langt frá. Samt ekki nógu sannfærandi. Hrikalegt að sjá tæklinguna á Nani undir lokin, hreint rautt spjald, en ég var alveg með á hreinu þegar hann var að veltast þarna að lokin. Það var ekki fyrr en í endursýningunni að groddaskapurinn sást. Portúgalir fá ekki neitt gefins í þessari keppni, það er svona að hafa verið að hrópa 'Úlfur, úlfur' í mörg ár.
Spá dagsins:
Austurríki - Króatía 0-2
Þýskaland - Pólland 1-0
Annars er ég of slappur til að hjálpa til í pallasmíðinni í dag, það gengur bara vel. Ekkert verra að slappa aðeins af eina helgi. Planet Earth hjálpar til, þvílík fegurð.

Hvað er málið??

2008-06-07T17:55:00.001Z

Það getur verið að aðeins hafi munað einu marki á minni spá og úrslitunum (átti að muna að það er aldrei skorað meira en mark per lið í opnunarleik) en ég var órafjarri því að spá rétt. Sviss getur að réttu verið dauðsvekktir, áttu seinni hálfleik alveg þrátt fyrir að hafa misst Frei útaf. Held að Portúgalir hafi þá, en Tyrkland - Sviss gæti orðið fróðlegt. Á móti kemur að Tékkland hefur besta markmann í heimi, en ekki mikið meira, gætu átt erfitt það sem eftir er.

Evrópumótið byrjar

2008-06-07T14:49:00.002Z

Björninn verður að skríða úr hýði til að tjá sig aðeins um Evrópumótið. Þetta er að mörgu leyti stórspennandi mót. Engir Englendingar þannig við erum laus við endalausan sleikjuskap við þann leiðindabolta í sjónvarpsmönnum. Stóru löndin eru öll með lið sem hafa einhvers konar veikleika en gætu jafnfram öll smollið saman og rúllað upp mótinu með stórleik. Spurningin er þá bara hvort að það er möguleikinn á öðru Grikklandsævintýri frá smærra liði.
En samt verður nú að spá fyrir þetta og mín spá er eftirfarandi:
1. Ítalía
2. Portúgal
3-4: Spánn og Þýskaland.
Leikirnir á eftir:
Sviss - Tékkland 0-2
Portúgal - Tyrkland 3-1
Held kannske áfram að henda inn leikjaspánni, en áskil mér rétt að breyta eftir fyrstu umferð frá þeirri spá einstakra leikja sem ég er búinn að gera núna
Annars eru Derby veðreiðarnar að byrja núna, horfi frekar á þær en niðurlægingu Svarthötta gegn Englendingum.

Hamingja

2008-05-21T23:18:00.001Z

Í kvöld er ég óumræðilega hamingjusamur.

Kettir

2008-05-20T06:14:00.002Z

Ég vissi að það hlaut að vera ástæða fyrir því að mér er vel við ketti.

Sigur í annarri tilraun

2008-05-18T18:26:00.001Z

Ekki hafði ég mörg orð fyrsta leikinn, tap gegn Selfossi var óþarfi, missa mann útaf í algerri vitleysu og tapa niður unnum leik. Rétt þó að minnast á að þetta var fyrsti leikur sem systkinin úr Logalandinu koma á.
Þetta var betra í dag. KA tekið á hraðanum í fyrri hálfleik, 2 mörk á 1 mínútu og síðan maður rekinn útaf sem ég sá ekki hvað var, strax í upphafi seinni hálfleiks. Það var samt eins gott að Høyer setti eitt beint úr horni, því KA sótti og sótti undir lokin án þess að hafa erindi sem erfið. Góð þrjú stig í hús, en enn þarf að bæta í.
Á morgun verður síðan brotið undan svölunum hjá mér... komst að því að þar er allt vel sprungið og gott ef ekki hálflaust. Ekki seinna vænna að byrja niðurbrotið enda verður garðurinn fjarlægður í vikunni. Allt að gerast í G22

Einu lokið og annað tekur við

2008-05-12T16:21:00.002Z

Eins og ætið á vorin, þá taka leiktíðirnar við hvor af annarri.
Fyrsti leikur Víkings í fyrstu deild hefst eftir 40 mínútur. Liðinu er spáð góðu gengi í sumar, vonandi að það gangi eftir, en gamlir stresshausar eins og ég eru alltaf svolítið svartsýnir, a.m.k. áður en vitað er hvernig liðið stendur sig í alvöru leikjum.
Það ætti þó alla vega að vera betra sumar í ár en fyrra hvað eitt varðar, ég sá nefnilega ekki einn einasta sigurleik Víkings í fyrra, þeir voru fáir og ég missti af þeim öllum.

Meistarar!

2008-05-12T10:59:00.004Z

Morguninn eftir meistaratitil er sætur. 10 titlar fyrir Sörinn og Ryan, og Scholes með átta ef mér skjátlast ekki og þar með búinn að jafna Hansen og Neal. Sætt að okkar titlahæstu menn eru sóknarsnillingar en hjá Liverpool eru það varnarmenn... segir svolítið, kannske.
Þegar litið er fjögur ár aftur í tímann byrjuðum við tímabilið með leik á móti Chelsea sem tapaðist naumlega, 0-1. Miðjan þann dag var Fortune, Miller, Djemba-Djemba og Giggs. Scholes og Alan Smith voru frammi og Keane í vörninni ásamt O'Shea, Silvestre og Gary Neville. Tim Howard var í markinu. Saha og van Nistelrooy voru meiddir og bekkurinn var Ricardo, Phil Neville, Bellion, Richardson og Forlan.
Það er fátt sem sýnir jafn vel hversu stórfenglegt uppbyggingarstarf hefur verið unnið síðan. Af þessum eru Giggs og Scholes enn í fremstu röð, O'Shea varamaður, Silvestre og Che Neville spila ekkert vegna meiðsla þetta árið og Saha er bara Saha. Aðrir eru farnir.
Ronaldo var kominn en spilaði ekki þennan leik og nokkrum vikum síðar var Rooney keyptur. Það tók tvö Chelsea sigurtímabil til að brjótast út úr púpunni og fjórða stórlið SAF er orðið raunin. Núna þarf bara smiðshöggið, sigur í Moskvu.
En hvað sem hver segir, þegar ég verð beðinn um besta byrjunarliðið sem sent hefur verið út á völlinn til að sigra og spila 'the United way' er enn langt í að þeir Schmeichel, Parker, Irwin, Bruce, Pallister, Keane, Ince, Kansjelskís, Giggs, Cantona og Hughes missi heiðursæti sitt í mínum huga.

Langt mál um síðustu helgi, nú og fótbolta auðvitað

2008-05-11T12:12:00.000Z

Alltaf einhvern veginn svo að ef ég trassa í 2-3 daga að skrifa um eitthvað sem gerðist, þá endar það svo að ekkert er skrifað.
En síðasta helgi var hreinlega of skemmtileg til að hún sleppi við að vera fest á blogg. Hún byrjaði á stórfínu vinnupartíi upp við Elliðavatn á miðvikudegi. Partíið var síðan ekki verra fyrir það að Liverpoolarar voru ekki frá sér af gleði allt kvöldið, en þeir voru samt ekkert að skemmta sér neitt minna fyrir vikið. Ég tók skynsama ákvörðun, var á bíl og var því ferskur sem fjóla daginn eftir, 1. maí, og brá mér í Víkina til að taka þátt í árlegri fjölskylduhátíð, sem í þetta sinn var viku fseinna en venjulega og var byrjunin á þriggja daga afmælishátíð. Afmælissýningin sem ég tók smá þátt í að setja upp var opnun og er hún sérlega flott, allir hvattir til að sækja hana, opin næstu 2 mánuði í kjallara Víkurinnar.
Á föstudaginn var síðan afmæliskvöldverðurinn. 500 Víkingar fylltu aðalsal Hilton Nordica og skemmtu sér stórkostlega. Þetta verður til að setja aukinn kraft í félagslíf Víkings því Víkingar finna hvað er gaman þegar við komum saman.
Aftur var ég á bíl og kom sér vel því laugardagurinn var langur, hófst með United sigri á West Ham, síðan enn og aftur í Víkina þar sem haldinn var hátíðafundur þar sem megindagskráin var heiðrun alla þeirra mörgu Víkinga sem hafa unnið óeigingjarnt starf fyrir félagið. Ég hef sum af þeim grunuð að vera að vinna með fleiri stundir í sólarhringnum en við hin, slík er eljusemin.
Frá Víkinni var haldið beint í partí ársins. 20 ára stúdentsafmælið var tekið með trukki og dýfu, flott forpartí og æðisleg veisla í Viðey. Stuðið var sem aldrei fyrr og árin, sem þó íþyngja fæstum, hrundu í burt og það var tjúttað fram á nótt. Ég veit að það var ekki nokkur þarna sem ekki skemmti sér stórkostlega.
Eftir stuttan rúnt í miðbænum hélt heim, þreyttur og glaður.
Bónus helgarinnar var að með sigri í umspili komst FC United of Manchester enn upp um deild. Nú fer þetta væntanlega að verða erfiðara. Hinn FC bloggari Íslands er nú þegar búin að minnast á þennan sigur, en því miður fyrir hana og aðra stuðningsmenn Halifaxhrepps lítur út fyrir að greiðslustöðvunin sé einungis stoppistöð á leið í gjaldþrot og að lið sem fyrrum var ástsælt á Íslandi muni brátt heyra sögunni til.
En brátt verður kominn tími til að gleyma kröggum neðrideildarliða í bili og horfa á ríku liðin og vona að United standi uppi sem meistarar eftir tæpa fjóra tíma!

Follow, follow, follow

2008-04-30T07:22:00.004Z

Follow, follow, follow
Cos United are going to Moscow
There'll be thousands of Reds
and they'll be pissed off their heads
Cos United are going to Moscow

Níu ár eru langur tími. Vill einhver redda mér ferð?

Viðurstyggilega stressaður

2008-04-29T17:54:00.001Z

Ég er viðurstyggilega stressaður. 50 mínútur í leik.
En ég er nýklipptur, með ný blöð og 2 bækur keyptar á frábæru verði í Nexus, og búinn að leggja plön að því að láta keyra garðinn minn á haugana.

Góð og slæm úrslit

2008-04-27T08:32:00.002Z

Eftir þennan ömurlega leik minna mann í gær og sanngjörn, en blóðug úrslit hef ég ekki einu sinni fengið mig til að lesa um hann í blöðunum og set strik undir hann hér með.
His vegar endaði FC United of Manchester í öðru sæti í sinni deild og er komið í umspil um sæti í 7. deild (Unibond Premier League). Um tíma leit út fyrir að liðið næði ekki umspilssæti en hlutirnir breytast skjótt og eftir sigur Woodley Sports á Bradford Park Avenue fyrir 10 dögum var meira að segja möguleiki á ná efsta sætinu af þessu sögufræga Bradford liði. Woodley Sports var einmitt liðið sem ég sá FCUM gera jafntefli við í haust. En Woodley voru ekki búnir, FCUM gerði jafntefli við þá á miðvikudag og þrátt fyrir sigur í gær var BPA stigi á undan þegar upp var staðið. Woodley endaði hins vegar í næst neðsta sæti.
Undanúrslitaleikurinn verður á miðvikudag og úrslitaleikurinn á laugardag.

Afmælisgjöf

2008-04-26T11:00:00.002Z

Handknattleiksmenn Víkings færðu félaginu frábæra gjöf í gær og tryggðu sæti okkar í efstu deild næsta vetur. Ekki síðri gjöf var fjölmennið sem var vil leikinn þó að ekki næði ég að vera þar á meðal.
Síðan heldur íþróttaspennan áfram, eftir 45 mínútur reynir United að tryggja sér meistaratitilinn með því að verða fyrsta liðið í nær fjögur ár að vinna á Stamford Bridge. Best að vera ekkert of bjartsýnn fyrir það!

Sneitt hjá ... næringu???

2008-04-24T09:42:00.003Z

Það hefur löngum verið greið leið fyrir kuklara að fá heilsíður fyrir fúsk sitt birtar í fríblöðunum tveimur, en nú hafa 24 stundir slegið öll met:
"Í meðferð sinni leggur Agniezka áherslu á breytt mataræði þar sem sneitt er hjá prótínum, fitu og kolvetni". 24 stundir, 24.apríl 2008, bls 50
Mér fallast hendur og mig skortir orð. Ljóst er að blaðamaðurinn Einar Jónsson er yfirgengilega fáfróður, hvort sem hann étur þetta beint upp eftir kuklaranum eða þetta er einhvers konar þýðingarvilla. Þar af leiðandi er allt sem svona 'blaðamaður' skrifar dautt og ómerkt.
Það breytir síðan í sjálfu sér litlu um læknismenntaðan kuklarann hvort þetta er rétt eftir haft eða ekki, allt annað sem hún segir dæmir sig sjálft og þetta er bara dropinn sem fyllir mælinn.
Annars var gærkvöldið ágætt, eyddi því í slíkum prýðisfélagsskap að það skipti litlu þó Barcelona - United leikurinn hefði verið næsta dapur.
Gleðilegt sumar!

Að hallmæla mönnum byggt á háralit og þjóðerni

2008-04-23T06:17:00.003Z

Í dag mun ég eftir fremsta megni reyna að sitja á strák mínum og vera ekki með ódýr skot á rauðhærða Norðmenn, og kemur þar auðvitað fyrst til að ég þekki bæði rauðhærða og Norðmenn og tel meðal vina minna. Reyndar verður að viðurkennast að á heildina litið eru Norðmenn sem ég þekki ekki meðal fjörugustu manna, en engu að síður mestu prýðismenn. Svo er líka hitt að það er mikið eftir, bæði í kvöld, á laugardaginn og í næstu viku og svo framvegis og eins og alltaf gildir að sá hlær best sem síðast hlær.
Engu að síður hlýt ég að spyrja: "John Arne Riise, oooh, aaah, I wanna knoooooow, how you scored that goal!"
Í mánudag átti Lalli vinur afmæli og blæs til veislu í dag. Ég ætla ekki að halda því fram að það sé eins og gerst hafi í gær að við vorum í fótbolta saman heilu sumrin, til þess er minnið of slakt, en það verður gaman að samfagna honum, og fræðast um hvernig það er að komast á fimmtugsaldurinn. Ég ætla mér enda að vera vel undirbúinn þegar það að kemur.
Síðan verður reynt að finna stað til að horfa á Barcelona leikinn í kvöld, væntanlega rólegur morgun á morgun og síðan vinna í Víkinni eftir hádegið. Þannig að eitthvað tefjast myndirnar sem farið er að þýfga mig um. Sjáum til. Annars er skemmtidagskráin geysiþétt næstu 11 dagana, margt og mikið til að hlakka til.

Má ég vera memm?

2008-04-22T17:09:00.002Z

Um daginn minntist frægasti Frambloggarinn á gamlan söng Frammara um að Víkingar væru félag stofnað af pjökkum sem hefðu ekki fengið að vera með þegar Fram var stofnað. Ég fæ ekki alveg séð hvers vegna það, þó alveg rétt væri, ætti að vera Fram til framdráttar. Ef eitthvað er, sýnir það dugnað og kraft yngri piltanna sem stofnuðu félag sem nú hefur lifað í heila öld, þó upphaflega væru þeir ekki taldir félagstækir. Og sýnir um leið skammsýni stofnanda Fram, sem þarna misstu af góðum félagsmönnum.
Það var enda ekki í síðasta skipti sem Framarar brenndu sig á því að vilja ekki góða menn, og er þar skemmtilegast að nefna síðasta Íslandsmeistaratitil Víkinga í knattspyrnu karla, sem er jú styttra í en síðasta Íslandsmeistaratitil Framara.
Það er þess vegna alltaf betra að leyfa sem flestum að vera með, það er aldrei að vita hvað úr verður.

Til hamingju Víkingur 100 ára!

2008-04-21T06:41:00.005Z

Fagni nú allir Víkingar nær og fjær því félagið okkar er 100 ára í dag. Ætli nokkuð annað félag sem stofnað var af jafn ungum drengjum hafi náð þessum aldri og þeim afrekum sem Víkingur sem hefur gert? Það er yndislegt að lesa Moggann í dag, glæsilegt hvernig þessarar hátíðar er minnst.
Í dag er sjálfur afmælisdagurinn og eftir vinnu verður haldið í Víkina í kaffi og konfekt, en í næstu viku verður svo tekið á því með trukki og dýfu, 1. 2. 3.! Fjölskylduhátíð, afmæliskvöldverður og hátíðafundur. Hvet alla Víkinga til að mæta á alla þessa viðburði og halda rækilega upp á þessi tímamót!
Nú er bara að smella á sig Víkingsbindinu og drífa sig í vinnuna

Squeaky bum time

2008-04-20T09:26:00.003Z

Já, það marraði rækilega í afturendanum á barstólnum á Glaumbar í gær. Eins og ég sagði var ég stressaður fyrir, enda hefur líklega enginn markmaður átt jafnoft stórleiki gegn United og Brad Friedel. Þoli hann ekki! En bráðnauðsynlegt stigið hafðist og enn er þetta í okkar höndum. Sumsé (til að skýra færsluna ef ég les þetta eftir 5 ár) Blackburn 1 - United 1.
Nennti svo ekki á Berserkjakvöld í gær, tsjillaði heima. Svo er fólk að koma í mat á eftir, einfalt og indverskt er á dagskránni, ef ég sprengi ekki grillið í loft upp, þ.e.a.s.

Verði úr verki og Lehrer live

2008-04-19T08:30:00.002Z

Ætla að reyna að láta verða eitthvað úr verki þessa helgina, setja myndir á vef, fikta aðeins í vefsíðunni minni, taka til í bókabúnkum og fleira smálegt. En í eftirmiðdaginn verður haldið á Glaumbar að sjá United, og ég er fjarri því jafn sigurviss og sumir. Í kvöld er Berserkjakvöld en ég lofa sjálfum mér rólegheitum því það er dagur eftir þennan, ekki ólíklegt að ég sjái mér fært að skreppa í vinnuna eftir hádegi á morgun, nóg að er að gera.
Annars er aðalástæðan fyrir að nenna að blogga er að koma Tom Lehrer enn á framfæri, fann 12 myndbönd á YouTube af honum á tónleikum sirka 1960. Gullmolar!. Öll myndböndin má finna á þessari síðu, en hér fyrir neðan er fagurt lag um endalokin. Þarna má finna eitthvað það magnasta rím sem um getur, einskist er svifist!

Síðan bendi ég á önnur live myndskeið af honum á YouTube sem vert er að skoða: I got it from Agnes og auðvitað hringitónninn minn, vorboðinn ljúfi, Poisoning Pigeons in the Park

Hæð

2008-04-16T06:28:00.003Z

Það var fermingarveisla í föðurfjölskyldunni á sunnudaginn, árlegur viðburður þar, en oftast bara ein, góð dreifing. Núna er ég því enn og aftur orðinn *næst* lægsti fermdi karlmaðurinn í fjölskyldunni. Mér er til efs að meðalhæð karlkynsafkomanda föður míns sé mikið undir einnogníutíu, við erum fjórir og svo sá nýfermdi sem erum undir 185 held ég. Fermingarbarnið frá í fyrra gnæfir nú yfir mig, og þess verður ekki langt að bíða að sá nýfermdi taki frammúr, hann er byrjaður á sprettinum og eldri bróðir hans er um 2 metrar. Þannig að þessar veislur vekja alltaf minnimáttarkennd. Bókstaflega.
Frægasti stuðningsmaður Luton á Íslandi bloggar um fall Luton og er eðlilega kokhraustur um að það sé gott að halda með litlu liðunum. Sem stuðningsmaður stórvelda bæði í Englandi og á Íslandi (þó það síðarnefnda hafi jú reyndar verið í smá síðdegislúr síðustu ár) þekki ég það ekki alveg, finnst mér gráupplagt að benda á þessa frétt: Aldershot kemst á ný í deildakeppnina. Næsti stórviðburður er síðan þegar AFC Wimbledon lumbrar á Milton Keynes Dons, þó að ekki gangi allt sem skyldi í vetur til að flýta fyrir því, og gæti verið að fyrr komi innrás FCUM í deildakeppnina. Stuðningur snýst um meira en áskrift að Sky, nefnilega.

Heyrn

2008-04-14T07:16:00.004Z

Ég fór í þrjár og hálfa viku til Mexíkó og Bandaríkjanna, kom heim fyrir 12 dögum, nenni ekki skrifa um það, en myndir koma í vikunni.
Hátíðnihljóð eru fyrir unglinga, en ef þú vilt prófa, getur þú fundið út hversu vel þú heyrir hátíðnihljóð. Mín niðurstaða:

You're really getting on a bit

You are either old or have really messed up your hearing by turning your amp up to 11 and listening to Spinal Tap. Or both.

The highest pitched ultrasonic mosquito ringtone that I can hear is 8kHz

Find out which ultrasonic ringtones you can hear!

Kemur mér ekki mjög á óvart, og því styð ég það að sem flestir fái sér hátíðnisímhringingar.
p.s. þetta virkar ekki í Firefox hjá mér, en mér fannst þetta nægilega forvitnilegt til að fýra upp IE.
pps. Já auðvitað á ég að vera farinn í vinnuna.

Takk Souness

2008-02-20T19:29:00.002Z

Ef maður hefur í gegnum tíðina ekki þakkað Graeme Souness nógsamlega fyrir að hafa klárað verkið sem Dalglish byrjaði á og rústað Liverpool liðinu, þá var að bætast enn ein ástæðan til að dá manninn. Honum bauðst að taka til Liverpool leikmann sem hafði átt í vandræðum heima fyrir og vildi byrja nýtt fótboltalíf í Englandi. Hann sagði Neitakk.
Eins gott.
Ég er nefnilega nokkuð viss um að ólíkt aulunum í Leeds hefði Liverpool ekki selt okkur Eric Cantona.

Versti stjóri sem ráðinn hefur verið oftar en einu sinni í efstu deild í Englandi. Staðreynd.

Banjó

2008-02-12T19:17:00.000Z

Fyrir nokkrum árum setti ég hér inn link á mp3 af Carmina Burana á banjó. Veit að hljóðskráin er löngu farin, en ég fann þetta á youtube:

Adblock

Ástæðan fyrir að ég leitaði og fann, var sú að ég sá þetta hér hlekkjað af Making light:

Adblock

og varð að sjálfsögðu hugsað til þessa gamla pósts míns.
Í öðrum fréttum er helst að ég er að skrópa, ætti að vera á Víking - Val í handboltanum og að ég er rétt að ná mér af augnígerð og sári á hornhimnu. Oj. Ekki treysta heimilislækni til að leita að eða finna hið síðarnefnda, best að leita beint til sérfræðings.

50 árum síðar minnumst við þeirra enn

2008-02-06T06:30:00.001Z

They shall not grow old as we that are left grow old
Age shall not weary them, nor the years condemn
At the going down of the sun, and in the morning
We will remember them

Geoff Bent. Roger Byrne. Eddie Colman. Duncan Edwards.
Mark Jones. David Pegg. Tommy Taylor. Liam Whelan.

The Flowers of Manchester:

Minningarsíða MUST
Minningarsíða opinberu heimasíðunnar
Minningarathöfn á Old Trafford er í dag frá 14:30, beint á MUTV, sem er óruglað í dag, bæði fyrir þá sem hafa Sky og líka hér á netinu. Dagskrá dagsins á MUTV er hér.

Besta mark sem nokkurn tímann hefur verið skorað!

2008-01-19T10:25:00.000Z

Auðvitað er titillinn ýktur, en ég er ekki frá því að þetta sé eitt frábærasta mark allra tíma.

Hef ekki séð þetta í bráðum 23 ár, en plaggat af Hughes í loftinu að skora var upp á vegg hjá mér á Hávallagötunni þangað til ég flutti held ég bara. Allavega eitt síðasta fótboltaplaggatið sem ég tók niður. Hann er líka eini karlmaðurinn sem ég hef séð ástæðu til að dást að lærunum á. Enda nýtti hann þau til góðra verka. "Not a great goalscorer but a scorer of great goals" eins og þar segir. Gaman að þetta sé loksins komið á YouTube.

Uppgjöf

2008-01-19T09:34:00.000Z

Gleymdi þessu: Sem ég hafði gefist upp á leiknum á fimmtudaginn og kíkti síðar á textalýsinguna á mbl.is (sem var reyndar geysiflott) blasti þetta við

Nú spyr ég: Er textinn þarna fyrir neðan hluti af auglýsingunni, eða einhvers konar skilaboð sem fólk gat sett inn á ÍBS síðunni??
Vonandi að United komi mér í gott skap í dag áður en ég þarf að horfa á Ísland aftur.

ertu ekki að fo...g grínast?

2008-01-17T20:30:00.000Z

Ég gefst up. Ég hata sænska landsliðið svo mikið að mér er illt. 20 mín. eftir og 6 marka forskot.
Ef það er eitthvað til sem heitir karma þá á Ísland eftir að vinna Svíþjóð með grilljón marka mun í úrslitaleik á HM eða ÓL. Ég er bara hræddur um að ég þurfi að lifa eitthvað fram á annað hundraðið til að sjá það.

Bandarísk pólitík

2008-01-11T07:06:00.000Z

Tók smá próf að gamni til að sjá hvern ég ætti að styðja í forsetakosningunum í BNA:
86% Dennis Kucinich
82% Mike Gravel
81% Barack Obama
80% Chris Dodd
80% Bill Richardson
79% Joe Biden
77% Hillary Clinton
76% John Edwards
38% Rudy Giuliani
30% John McCain
29% Ron Paul
25% Mitt Romney
22% Mike Huckabee
13% Tom Tancredo
13% Fred Thompson

2008 Presidential Candidate Matching Quiz
Kemur ekki stórlega á óvart, tók eitthvað svipað um daginn með svipuðum niðurstöðum.
Og þarna kemur ekki fram aðalástæðan fyrir að mér líkar ekki alveg við Barack, hann er aðeins of mikið að sleikja sér upp við kristna með ummælum sem ganga á hlut okkar trúleysingja.

Nálapúði

2008-01-08T20:17:00.000Z

Upphandleggir mínir eru aðeins nálapúðalegir í dag, dreif mig í Mjóddina og fékk þrjár sprautur til að vera fær í flestan sjó í komandi ferð til Mexíkó. Gott að vera búinn að þessu.
Helgin var sérlega góð, þrír félagar úr M.R. reyndu aftur að gera góðan hitting og tókst betur en síðast, helgina fyrir jól. Þá komst einn ekki nema í svona hálftíma, sem reyndar lengdist í rúma tvo. Núna byrjuðum við á að borða á Síam, fínn matur þar, og ég komst að að ég ræð við meðalsterkan mat þar. Síðan var haldið út á Norðurbakkann og setið fram eftir kvöldi þangað til að fertugsafmæli kvöldið áður fór að segja til sín hjá þeim sama og fór heim snemma síðast, þannig að hann fór heim en ég og húsráðandi röltum í miðbæ Hafnarfjarðar og kíktum inn á Kaffi Aroma í Firðinum sem var bara ágætt, jólabjór á krana klikkaði ekki. Síðan fórum við í alvöru miðbæinn og tókum svipað sving og þarna fyrir jól, B5 og Apótek, slepptum reyndar Ölstofunni í þetta sinn. Sunnudagurinn var auðveldur, held að ég sé farinn að sjá út hvað er skeinhættara mér daginn eftir en annað. Afskaplega góð skemmtun semsé.

Gleðilegt nýtt ár

2008-01-01T23:03:00.000Z

Það kemur fyrir að morgunhaninn ég vakna klukkan þrjú, og ég tek því yfirleitt bara vel.
Sama var upp á teningnum í dag en það óvenjulega var að klukkan var þrjú eftir hádegi. Ekki alveg persónulegt met, en miðað við að ég var kominn í koju fyrir tvö í nótt, vissulega vel að verki staðið. Hvort þetta bendir til að á árinu breytist ég í B-persónu verður að koma í ljós. En fyrir vikið varð þetta að náttfatadegi, sem sumir bloggarar hafa keppst við að dásama sem hámark hvíldar og afslöppunar. Ég get eiginlega bara tekið undir það.
Jólin voru eilítið endaslöpp eins og sagði í síðustu færslu. Eftir gott aðfangadagskvöld sló humarinn og kampavínið sem ég fékk mér í jólahádegismat mig í ból og ég rétt komst í jólaveisluna um kvöldið, með snert af hálsbólgu. Veislan var hins vegar þess virði að komast í, m.a. uppskar ég eina bestu gjöf jólanna, heila krukku af einhverju mesta gómsæti sem ég þekki, heimagerðri chilisultu. *jömmí*. Hálsbólgan hafði mig svo undir á annan og ég rétt komst í vinnu á föstudeginum. Lá síðan í bæli mest alla helgina og svaf næsta óreglulega. Rétt náði að hafa mig út og kaupa fallega steik til að hafa á gamlárskvöld, enda hafði fast boð undanfarinna ára dottið uppfyrir. Ég var síðan varla kominn úr vinnu í gær þegar bróðir hringdi og bauð mér í mat. Ég átti síðan rólega kvöldstund með þeim og komast að því að þau höfðu verið í svipuðum veikindum sem skýrði síðbúið boð, enda óljóst fram á síðustu stundu hvernig heilsan var. Rólegheitin voru því mjög kærkomin okkur öllum þremur og veislan mjög góð. Næstu áramót verður þetta vonandi svipað, þá jafnvel með meiri fyrirvara.
Sem fyrr segir er dagurinn í dag búinn að vera afskaplega stuttur og rólegur en ég dreif mig í eldamennsku, og eldaði án asa humarinn og steikina sem ætluð hafði verið gamlárskveldi. Vil hrósa ríkinu fyrir að hafa tekið upp á því að selja kvartflöskur af víni, fyrir vikið er ekki hálftóm flaska að bíða dauða síns einhvern næstu daga þegar ég kemst að því að afgangurinn er orðinn skemmdur.
Hefði kannske getað valið sjónvarpsefnið betur í dag, komst að því sem mig grunaði að Matrix Revolutions er hrein og klár steypa og með alkalískemmdum að auki. Breiðavíkurmyndin var auðvitað skylduáhorf, en ekki er hún skemmtiefni.
Ætli ég hressi mig ekki við fyrir svefninn með smá Buffy, og aðeins meira af eðalstöffi frá Benjamín og Jeremíasi. Það klikkar hvorugt.
Óska síðan lesendum mínum (öllum tíu) gleðilegs nýs árs með kærum þökkum fyrir lesturinn síðasta árið, ég veit að ég hef ekki ofgert neinum!

Egg og kjúklingar

2007-12-29T22:59:00.000Z

Held ég hafi séð fjórar greinar í gær og morgun um að 'United stefni hraðbyri að titlinum'. Er hægt að biðja um meira óheillamerki? West Ham á mikið inni hjá okkur, hafa gert okkur ófáa grikki í gegnum tíðina. En deildin verður hörkuspennandi, spái því að fjögur lið verði í toppbaráttunni a.m.k. fram í mars og allt of snemmt að slátra kjúklingnum.
Eins og venjulega hef ég lítið um annað en íþróttir að segja. Jólin voru róleg, hreindýr tvo daga í röð og svo veikur. Er varla byrjaður á einu bókinni sem ég fékk, ævisögu Davíðs Stefánssonar. Stór hluti aðfangadagskvölds fór í að setja saman Lego. Alltaf jafn gaman að fikta í Legó, og langt síðan síðast, en kannske ekki alveg eins spennandi þegar þetta er prinsessulegó. Annað hvort verð ég að reyna að koma dömunni á Technics bragðið, eða bíða þessi 2 ár eða svo þangað til litli bróðirinn uppfærir úr Dúpló.

Gleðileg jól!

2007-12-24T13:40:00.000Z

Jólastússið var óvenjulítið þetta árið og allt er tilbúið nema að pakka inn nokkrum gjöfum. Ætla að gera það meðan ég horfi á Hogfather. Fór í gamla kirkjugarðinn í morgunn í þessari líka jólalegu hundslappadrífu.

Þá er ekkert annað eftir en þetta:
Bjarnarbloggið og aðstandendur óska lesendum, vinum, kunningjum, inndetturum, fastagestum, hnýsnum persónunjósnurum og öðrum öðlingum
Gleðilegra jóla
Kærleiksríkrar Kristsmessu
og almennt
Gleðilegrar, hamingjuríkrar, afslappaðrar, fjölskylduvænnar (ef við á), gjafaríkrar (sælla er að gefa en þiggja og hver vill ekki að náunginn njóti sælu?), matarmikillar og ljúfrar hátíðar!
Sol Invictus rís enn á ný!

og ekki má gleyma, eins og ég var næstum búinn að, hinum árlega jólasveini:

Svæðisvörn

2007-12-16T17:01:00.000Z

Það er að verða árlegur viðburður að heyra Andy Gray fjalla um svæðisvörn og galla hennar eftir Liverpool - United leiki.
Í janúar í fyrra tók hann góða rýni á þetta sigurmark á síðustu mínútunni eftir aukaspyrnu:

og þótti þetta skólabókardæmi um hvernig svæðisvörn klikkar.
Síðasta vor sést hérna:

hvernig John O'Shea dansar fyrir framan fjóra varnarmenn sem allir eru að dekka svæðið frekar en manninn og þess vegna endar Johno frír og þrumar í netið.
Og enn í dag fékk Gray að predika: Rio dró með sér Torres sem eins og í fyrra horni var eini varnarmaðurinn sem fylgdi manni, fjórir varnarmenn röðuðu sér á markteiginn án þess að vera dekka neinn, Rooney fékk að skjóta óáreittur og Tevez var óvaldaður inni í markteig. (takk Benayoun fyrir að hlaupa ekki út). markið sést hér.
Takk Rafa, og megi Liverpool spila svæðisvörn sem lengst. Eins og Andy Gray var að segja: "Ég hef aldrei séð svæði skora mark í fótbolta". Hins vegar hafa Rio, Johno og Carlos núna allir skorað sigurmark á Anfield. Tevez tók þetta reyndar á lokamínútu fyrri hálfleiks, ólíkt hinum tveim, og það er svolítið þægilegra en hitt.

Sætt, yndislega sætt

2007-12-16T15:54:00.000Z

Þetta var frábær sigur á Anfield, fyrst og fremst sterk og grimm vörn sem skóp hann. Patrice Evra var að öðrum ólöstuðum maður leiksins. Þetta þýðir að það verður gaman í vinnunni næstu vikuna!

Terry Pratchett

2007-12-12T18:09:00.000Z

Slæmar fréttir fyrir aðdáendur Terry Pratchett.
Hann hefur greinst með 'early-onset' Alzheimer. Hefur þó góðar vonir um að klára nokkrar bækur í viðbót og tekur þessu með jafnaðargeði, og nokkru gríni.
Er ekki alveg viss um að ég geri það sama.
Vonum það besta.

16 ár

2007-11-24T08:18:00.000Z

Þegar mamma sagði mér nývöknuðum að Freddie væri dáinn benti ég henni vinsamlega á að þetta væri nú bara misskilningur í gömlu konunni, hann hefði bara tilkynnt daginn áður að hann væri með eyðni, þetta væri ekki búið enn.
Ekki í fyrsta eða síðasta skiptið sem mamma hefur réttara fyrir sér.
Síðan eru sextán ár.
Var á Herrakvöldi Víkings í gær. Góð skemmtun, Guðni Ágústsson átti salinn, sem kom sumum vissulega á óvart. Á eftir fór hann að rifja upp þegar hann hitti mig sem krakka. Ég efast ekki um að ég kunni mun minna í Njálu nú en þegar ég var fimm ára. Kominn tími á að lesa hana aftur frekar en þetta endalausa SF&F, þó skemmtilegt sé. En ætli ég verði ekki að klára bunkann sem ég fékk um daginn fyrst. Er með bókamerki í einum 6 bókum núna. Helgin fer í það, og 6-Y hitting í kvöld. Ekki seinna vænna að hittast, svona rétt áður en við verðum tuttugu ára stúdentar, og engi.. næstum enginn orðinn fertugur.
Brandari vikunnar:

Tributes are being paid to Scotland this morning [á fimmtudag] after the entire country laughed itself to death,
The alarm was first raised at around 10pm last night as thousands of phone calls and text messages went unanswered.
Small groups of volunteers from Berwick-upon-Tweed and Carlisle ventured north just after midnight only to find houses full of dead people gathered around still blaring television sets. By dawn, as RAF helicopters flew over deserted city streets, it was clear that the whole country had suffered a catastrophic abdominal rupture.
Wayne Hayes, a special constable from Northumberland, said: 'We went into one house in Dunbar and found three men sitting on the sofa with huge smiles on their faces, still holding cans of 70 Shilling. They seemed to be at peace'
Moving tributes are already being placed along the Scotland-England border with many mourners opting to leave a simple bag of chips or a deep-fried bunch of flowers.

Mynd vikunnar: Ástæðan fyrir að Ronaldinho getur ekki blautan lengur. Hrikalegt að sjá þetta. Og að hugsa sér, ef United hefði fengið Ronaldinho, værum við ekki með Ronaldo. Í dag myndi enginn United maður skipta.
Blast from the past vikunnar: Man ekki afhverju einhver benti á þessa gömlu frétt, en ég hef ekki hlegið jafn mikið lengi: Bjartsýni Liverpool manna er eilíf.. Auðvelt að vera vitur eftir á, en þetta er samt bara fyndið núna. Hvar er Le Tallec í dag??? Annars er þetta bara biturð út í að það sé ekki til jafn gott United blogg...

Fjögur eru nóg

2007-11-07T21:41:00.000Z

United lét sér nægja fjögur mörk, og þökk sé jöfnunarmarki Roma undir lokin er United komið áfram. Þá er bara að einbeita sér að deildinni.

Beðið með eftirvæntingu

2007-11-03T10:58:00.000Z

Fór aðeins út á lífið í gær, var frekar stilltur og vaknaði hress og kátur, dreif mig í ræktina núna áðan og bíð nú spenntur eftir Arsenal -United. Yfirleitt eru stórleikir lítið fyrir augað, járn í járn, en liðin hafa bæði verið að spila geysifagran fótbolta og ef bæði halda sig við það gæti þetta orðið klassísk viðureign. Ég hlakka ofsalega til.
Heyrði í einum dyggum lesanda á fimmtudaginn sem kvartaði undan því að þetta væri lítið annað en boltatuð og vildi heyra eitthvað um menn og málefni. Ég legg eiginlega ekki í það, það geta allir sem eitthvað þekkja til mín, þó ekki nema af þessu bloggi væri, hvar ég stend í helstu umræðuefnum vikunnar og finnst satt að segja mótrök í sumum málum svo gjörsamlega glórulaus að það er ekki orðum eyðandi á.
Á hinn bóginn fagna ég vaxtahækkun Seðlabanka. Það er orðið morgunljóst að þenslan er bara á leiðinni áfram og það verður að reyna allt til að draga úr neyslunni. Meira að segja hjá mér dregur þetta úr græjufíkn. Svolítið allavega... Hagfræðin, hin döpru vísindi. So true.

Góður laugardagur

2007-10-28T11:04:00.000Z

Verulega góður dagur í gær. Hófst á ferð í ræktina (átak í gangi, gengur ekki illa), síðan var það Musteri Mammons til að græja gjöf. Var búinn að mæla mér mót við vin á Glaumbar og kom við hjá öðrum til að ferja hann þangað. Frú þess síðarnefnda kom í tæka tíð heim og við drifum okkur í bæinn og sáum okkar menn rústa 'boro 4-1. Frábær fótbolti og spennandi að sjá að fremstu fimm menn okkar í leiknum eru allir 23 ára eða yngri. Ferjuðum einn bíl á Víðimel að leik loknum og svo var haldið heim. Kvöldið byrjaði kl.6 þegar mamma kom við og við fórum í veislu til að samfagna Möggu frænku að hafa loksins ákveðið að skilja við lögfræðideildina þrátt fyrir að henni hafi greinilega þótt ákaflega gaman að vera skráður nemandi! Maður þekkir aldrei of marga lögfræðinga.
Garðabærinn var lokaviðkomustaður kvöldsins, þrítugsafmæli yfirmannsins og þar var skemmt sér og dansað fram á rauðanótt í frábæru partíi!
Sem sé, geysigaman í allan gærdag, og eftirköstin lítil.
FC United vann reyndar líka góðan sigur í gær. Ekkert að því!
Og að lokum, fyrir þá fáu lesendur sem vita ekki af því, þá er ég á Facebook

Auglýsing

2007-10-25T20:38:00.000Z

Mér finnst þessi auglýsing FRÁBÆR

Síðasta rúgbýfærslan

2007-10-23T20:35:00.000Z

Það er svo sem lítið að segja um úrslitaleikinn á laugardaginn var annað en að Suður Afríka klikkaði, hélt Englendingum í skefjum og vann 15-6, allt saman spörk. Reyndar var snertimark dæmt af Englendingum, en það var að því er mér sýndist rétt. En gargandi skemmtun var þetta ekki.
Svo kemur í ljós hvort bætist í þriggjalanda keppnina á næsta ári, vandinn fyrir Argentínu er hve margir leikmenn þeirra spila í Englandi og Frakklandi og ættu erfitt með að fá sig lausa.
Ég hvíli ykkur semsé frá rúgbý fram á næsta sumar en síðasti fróðleiksmolinn um þessa ágætu HM er svona: Vissuð þið að deildarkeppnin í Englandi hélt áfram á fullum krafti á meðan keppnin fór fram? Það er semsé bara verra að hafa fullt lið landsliðsmanna.
Í kvöld var klassískara sjónvarpsáhorf, fagurt að sjá United rústa Динамо Київ. Reyndar er ekki hægt að segja að Kiyv hafi veitt mótspyrnu, en þessi tvö mörk þeirra voru gjörsamlega óþörf.
Flott kvöld hjá United, næstum flottara hjá Arsenal. Ætli ég beri mig ekki eftir því að horfa á Arsenal - Liverpool á sunnudaginn, þarf að sjá hvernig þetta Arsenal lið ber sig að.

Það óvænta gerðist: það vænta gerðist

2007-10-15T05:13:00.000Z

Loksins eitthvað eftir bókinni. Síðustu tíu mínúturnar í hvorum hálfleik gerðu útaf við Argentínu, og sigur Suður Afríku var mjög öruggur. Ég sá reyndar bara seinni hálfleik, kom inn rétt í þann mund sem tæpt snertimark Argentínu var dæmt löglegt og hleypti smá spennu í þetta, þannig að það var allt í lagi að horfa á leikinn.
Nú er bara að vona að Bryan Habana tryggi sér titilinn Maður Mótsins með toppleik móti Tjöllum, til þess er hann nógu skemmtilegur og góður. Ég meikaðaekki ef Jonny Wilkinson sparkar Englendingum aftur til sigurs! Englendingar viðurkenna reyndar vel að sigurinn á Frökkum á laugardag hafi ekki verið fagur eða léttleikandi, en úrslitin telja og það verður að viðurkennast að umsnúningurinn frá 0-36 tapi gegn Suður Afríku í fyrsta leik hefur ótrúlegur. En nú er nógu langt gengið og nema SA vanmeti þá gjörsamlega vegna þessa fyrsta leiks, þá á Suður Afríka að tryggja sér þetta. Áfram Boks!
En nú skulum við byrja vikuna á að skella okkur í ræktina. Maður þarf jú að komast í ~~kjólinn~~fínu fötin fyrir jólin. Það er víst ekki nóg æfing að lesa bloggið hans Gunnlaugs, jafnvel þó maður svitni og ofandi við lesturinn.

Eyjólf burt.

2007-10-13T17:58:00.000Z

Fjögur mörk á okkur á heimavelli? Gjörsamlega óásættanlegt.
Það er hægt að tuða endalaust að við vinnum ekki leiki ef við skorum ekki, en við vinnum ekki leiki nema við fáum ekki á okkur mörk.
Skemmtanagildið á að vera númer tvö, árangur verður að vera númer eitt.

Þögnin var æpandi

2007-10-12T18:20:00.000Z

Já, mikið rétt, Shift-3 hittir naglann á höfuðið.
Ég horfði á seinni undanúrslitaleik laugardagsins síðasta síðla nætur eða á sunnudagsmorgni, nýkominn úr bænum eftir indælan kvöldverð hjá Hildigunni og Jóni Lárusi og frekari næturgöltri eftir það og var því ekki mjög vel vakandi. Ég gat engu að síður ekki afskrifað tap minna manna sem slæman draum, en var alls ekki í standi til að fjalla um málið daginn eftir.
Stutta útgáfan er auðvitað sú að Frakkar unnu, að mestu verðskuldað þó að dómarinn hafi reyndar sent mann útaf (10 mín. brottvísun) að ósekju og síðan misst af sóknarbroti þegar Frakkar skoruðu seinna snertimark sitt. Langa útgáfan er í nýsjálensku blöðunum alla þessa viku, en besta lýsingin er sú að Alsvartir hafi hreinlega ekki mætt til leiks. Enn einu sinni lofa þeir meiru fyrir keppnina með leik sínum en staðið er við þegar á hólminn er komið.
Það er því ekki að ósekju að síðasti laugardagur sé kallaður óvæntasti dagur í sögu íþróttarinnar!
Sunnudagurinn var eftir bókinni, og þó. Fiji stóð glæsilega í Suður-Afríku þó að mörk undir lokin hafi gert að verkum að úrslitin sýndu öruggan sigur Springboks. Argentína - Skotland var spennandi en Argentínumenn höfðu það.
Á morgun mætast því Englendingar og Frakkar og á sunnudag Argentína og Suður-Afríka. Ég ætla að spá óvæntum úrslitum áfram og horfa annan laugardag á úrslitaleik Englendinga og Argentínumanna.

England áfram!

2007-10-06T14:42:00.000Z

Ótrúlegt en satt. Ástralir voru heillum horfnir, Englendingar vörðust af hörku og lokatölur voru 12-10. Endland spilar við sigurvegara kvöldsins, og fyrirfram hefði maður viljað þetta, en þetta skyldi þó aldrei vera fyrirboði fyrir kvöldið. Vonum ekki.

Frakkland - Nýja Sjáland

2007-10-06T13:38:00.000Z

Sit hér og horfi á mína menn skora 2 mörk í deildarleik í annað skiptið á tímabilinu, þetta er allt að koma.
Þetta er auðvitað ekkert búið að vera gaman síðustu viku að horfa á eftir Víkingi niður, það verður nóg af rútuferðum á næsta ári, 8 ferðir út fyrir höfuðborgarsvæðið. Vonum hið besta.
En nú er loksins gervistríðinu lokið í HM í rúgbý. Í riðlakeppninni kom þó Argentína verulega á óvart, vann sinn riðil, skildi Frakka eftir í öðru sæti og Íra úti í kuldanum. Að öðru leyti kom einungis það á óvart að barátta Fiji skilaði þeim sigri gegn slöku liði Wales sem var heillum horfið í keppninni.
Suður-Afríka leikur því gegn Fiji á morgun og Argentína gegn Skotum. Suður Afríka vinnur og ætla má að Argentína vinni Skota.
Núna er hins vegar leikur Englands og Argentínu í gangi, endurtekning síðasta úrslitaleiks þegar England var heimsmeistari á síðustu sekúndu. Enginn ætlar hið sama í dag, Englendingar hafa verið afspyrnuslakir. Þegar fyrri hálfleikur er hálfnaður er staðan þó 6-3 fyrir Englandi, tvö víti gegn einu. Það breytist.
En það sem mestu máli skiptir er í kvöld. Tap Frakka þýðir að þeir þurfa að fara að heiman, og leika í Cardiff við besta rúgbýlið í heimi, Alsvart lið Nýsjálendinga. Helsta vandamál Alsvartra er að þeir hafa ekki leikið erfiðan leik í keppninni fram að þessu og því er þetta fyrsta þolraunin. Nýsjálendingar eru því sumir ansi óöruggir, minnast t.a.m. undanúrslitanna fyrir 8 árum þegar Frakkar unnu. Það hefur nefnilega verið svo í mörgum undanförnum keppnum að Alsvartir hafa verið langbestir í heimi milli heimsmeistarakeppna, en svo fallið úr leik þegar á hólminn er komið. Ég trúi því ekki að sú verði raunin, til þess eru mínir menn hreinlega of góðir.
En nú er flautað til loka á Old Trafford, fjögur mörk komin, United orðnir efstir og ég get skipt yfir á England - Ástralíu þar sem staðan er 6-10. Það er réttara.

Athafnir.

2007-09-25T17:44:00.000Z

Eitt af því sem felst í því að vera trúlaus er aðskilnaður frá öllum helstu merkisathöfnum mannlífs á Íslandi, fyrir utan afmæli. Þessar stóru vörður á lífsleiðinni, nafngift, manndómsvígsla, brúðkaup og dánarkveðja eru rígnegldar við kirkjudyrnar.
Og þó. Síðustu 20 ár hefur borgaraleg ferming náð fótfestu og er það vel, enda eru þáttakendur í fermingunni á þeim aldri sem er hvað viðkvæmastur fyrir að vera ekki eins og aðrir og að veita þeim tækifæri til að finna sér hóp er ómetanlegt.
En eftir standa hinir þrír. Siðmennt veitir upplýsingar um allar fjórar tegundir athafna, en það er fyrst nú sem fréttnæmt verður að haldið er veraldlegt brúðkaup.
Í tengslum við umræðurnar um veraldlegu hjónavígsluna tók ég fyrst og fremst eftir einu, og líklega ekki því sama og aðrir. Það var athafnastjóratitill Jóhanns Björnssonar.
Samkvæmt bloggi Jóhanns kemur í ljós að "hafa nokkrir einstaklingar núþegar tekið námskeið í veraldlegri útfarastjórn". Þetta er löngu tímabært og mikið fagnaðarefni.
Mikið verk er enn óunnið og langt í land. Hin ótrúlegu viðbrögð Salarins í Kópavogi að neita að halda athöfnina, og skítkast út í Siðmennt á bloggsíðum sýna það.
Hvað svo sem halda má fram um hversu rétt það er að halda veraldlega athöfn í Fríkirkjunni eða ekki, þá er það verulegt umhugsunarefni að það hreinlega vantar staði sem eru jafn fallegir og tignarlegir, hvort sem fyrir brúðkaup eða jarðarför. Það er vel hægt að segja "ef þú vilt ekki kirkjubrúðkaup ferðu bara til sýslumanns", en þetta er jafn fjarstæðukennt og að halda fram að valið standi milli trúarlegrar útfarar og að vera huslaður í kyrrþey utan kirkjugarðsveggjar. Það er ekki trúin á Guð sem gerir brúðkaup að þeirri hátíðarstund sem það er. Og kveðjustund látins sem er ekki á leiðina í einhverja 'eilífð' á síst að vera veigaminni en hin.
Siðmennt má ekki vera 'trúfélag' og ég er reyndar alls ekki viss um að ég myndi vilja sjá 'opinbert' trúleysisfélag , en eins og staðan er nú, þá er ekki hægt að brjóta múrana á annan hátt. Til dæmis held ég að athafnarstjórar erlendis (celebrants) séu ekki endilega beintengdir einhverjum húmanistafélögum, en meðan viðurkenning á nauðsyn ótrúartengds hlutverks sem slíku er ekki til, verður Siðmennt að ryðja brautina.
Að baki þessu öllu liggur einfaldur sannleikur. Þegar veraldlegar nafngiftir, brúðkaup og jarðarfarir verða orðnar daglegt brauð, og jafn hátíðlegar og fallegar og kirkjuathafnirnar mun nefnilega trúarþörf Íslendinga snarminnka.
Það skyldi þó aldrei vera að einhverjir væru á móti því?
P.s. ég er ekki félagi í Siðmennt, en sem ég skrifaði þennan póst sá ég að ég varð að ganga í félagið. Og gerði það rétt í þessu.

Meira HM

2007-09-16T11:29:00.000Z

Það eru fleiri HM í gangi, nú rétt í þessu voru Svarthettir að vinna Indland í fyrsta leiknum í milliriðlum í heimsmeistarakeppninni í tuttugu20 krikket, útgáfunni fyrir þá sem líður yfir þegar þeir heyra minnst á fimmdaga leiki og sofna yfir einsdags leikjum.
Svo var bara mynd í Mogga í dag úr England - Suður Afríku leiknum frá á föstudag, "Ekki fylgi sögunni" hvernig leikurinn fór, það kemur ekki á óvart að blaðamenn Morgunblaðsins kunni ekki að gúgla. Enda ekki í þeirra verkahring að miðla upplýsingum.
Keflavíkurferð á eftir. Taugarnar eru þandar.

Skyldan

2007-09-15T14:19:00.000Z

Það segir svosem ýmislegt um íþróttina að lið númer 1 í heiminum sigrar lið númer 22 108 - 13 í heimsmeistarakeppni. En skyldusigur á Portúgal er að baki og nú eru menn að hafa áhyggjur af því að Alsvartir séu ekki með nægilega sterka mótherja í riðlinum til að búa sig undir útsláttir. Og þó, Skotar eru eftir, og aldrei að vita nema að þeir veiti smá viðnám. Ástralir eru smátt og smátt að brjóta niður Wales á Þúsaldarvellinum í Cardiff og þó ekki sé það algert burst enn, þá held ég að Þríþjóðirnar séu rækilega að stimpla sig inn í þessa keppni.
Ferdinand í síðasta leik, Vidic núna. WTF? Er United hið nýja Arsenal? Nei ætli það, hef fulla trú að við finnum aftur okkar létta og skemmtilega leikstíl. Nóg eftir og núna er komið að Evrópukeppninni, Nani og Ronaldo heimsækja fornar slóðir í Lissabon á miðvikudaginn.

Englandi rústað.

2007-09-14T20:54:00.000Z

Kom heim frá London í eftirmiddaginn, í tæka tíð til að sjá Suður Afríku rústa Englendingum, 36-0. Auðvelt. Nú þarf England að vinna Samóa eftir viku, England ætti ekki að klúðra því, en það er ekki alveg eins öruggt ef Englendingar taka sig ekki saman í andlitinu eftir þessa upprúllun.

Ítölsk martröð

2007-09-08T12:06:00.000Z

Það tók mína menn 1 mínutu og 3 sekúndur að skora fyrsta snertimarkið, núna eru 20 mínútur liðnar og staðan er 38-0. Þetta ætti að vinnast. Ég ætla ekki að fara að vorkenna Ítölum nema þetta fari yfir 100...
Sem sé, æðislegt!

Óvænt!

2007-09-07T21:06:00.000Z

Óvænt úrslit strax í fyrsta leik! Púmurnar náðu að skora snertimark í fyrri hálfleik og leiða 17-9. Og þrátt fyrir japl jaml og fuður náðu Frakkar aðeins einu víti í síðari hálfleik og leikurinn fór 17-12. Eins og bíbísí segir, engin þjóð hefur tapað í riðlum og orðið meistari, og það er bara tímaspursmál þangað til Argentína verður með í annað hvort sexþjóða eða þríþjóða. Hið síðarnefnda liggur beinar við.
En þetta þýðir bara eitt. 'Við' mætum Frökkum í fjórðungsúrslitum. Nema eitthvað frekara óvænt gerist. Eins og t.d. að Írar taki Frakka? Þá verður kelkonnað duglega í híbýlum Parísardömunnar!

Heimsmeistarakeppnin byrjar

2007-09-07T19:08:00.000Z

Tvær mínútur liðnar af fyrsta leiknum í þeirri heimsmeistarakeppni sem er númer þrjú á vinsældalistanum mínum. Fylgdist með minni fyrstu á eftirminnilegan hátt sumarið 1995, úrslitin voru auðvitað ekkert nema þjófnaður með matareitrun. Man minna eftir 1999 en fyrir fjórum árum gat ég fylgst betur með, nema þá var tímasetning leikjanna (og núna skorar Argentína fyrstu stig keppninnar) erfið.
Nú er ekkert til fyrirstöðu því að sjá sem flesta leiki, allt á skikkanlegum tíma og í riðlakeppninni eru nær allir leikir sem skipta máli um helgar.
Það sem er auðvitað verst er að 20 liða keppni með fjórum riðlum er ekki mikill vafi um það hvaða lið komast áfram (og Frakkar jafna). Það er ekki nema helst spurning um hvort Ítalía nái að skjóta Skotum ref fyrir rass.
Nú er auðvitað mál að kynna keppnina almennilega til sögunnar, þetta er auðvitað heimsmeistarakeppnin í rúgbí. Haldin í Frakklandi í þetta sinn (að mestu, Skotland og Wales fá að spila aðeins á heimavöllum) og ef Frakkar keppa ekki við Alsvarta í úrslitum (Argentína kemst aftur yfir) þá verða allir afskaplega hissa. Ítalía er nýbúin að fá að vera með í Fimmþjóðakeppninni, sem heitir núna Sex þjóða. Síðan er suðurhvels þriggjaþjóða keppnin og þá erum við komin með níu bestu þjóðirnar. Annars er það helst Argentína sem er með almennilegt lið, en Írland ætti að vera of sterkt fyrir þá í riðlakeppninni. Suðurhafseyjarnar líða fyrir að flestir bestu leikmanna þeirra enda hjá Alsvörtum eða Áströlum, en ég held í vonina að Samóa vinni England. Þá glotti ég.
Nema hvað, stuðningur minn er sem ætíð eindreginn með Alsvörtum sem eins og venjulega hafa verið með yfirburðalið milli keppna, en hafa verið með eindæmum óheppnir eða klaufskir þegar á hólminn er komið. Nú er kominn tími á titil númer tvö og Daniel Carter sýnir að hann er langbestur.

Meiri raunir.

2007-08-19T15:50:00.000Z

Og enn versnar það. Og auðvitað þurfti það að vera Siddy sem sá um fyrsta tapið á tímabilinu. Spurning um að kveða titilinn nú þegar?
En menningarnótt var góð, var í bænum frá 3-2 með góðu fólki í frábæru veðri. Ekkert að því.

Raunir og erfiðleikar

2007-08-17T18:26:00.001Z

Það er stundum, jafnvel oft, erfitt að vera Víkingur.
En pabbi beið 57 ár milli Íslandsmeistaratitla. Þannig að ég get ekki byrjað að kvarta almennilega fyrr en eftir 41 ár.

Ekki mikið

2007-08-06T15:17:00.000Z

Alltaf svolítið athyglisvert þegar RSS lesarinn pikkar upp færslur og sýnir sem svo kemur í ljós að eru horfnar af viðkomandi bloggi.
Annars er ég að ná að leasa þriggja vikna skammt af gömlum United póstum og sé m.a. vitnað í John Cleese í Clockwise:

It's not the despair. I can take the despair. It's hope I can't stand

En eigum við samt ekki að vona að United gangi vel á tímabilinu þrátt fyrir að hafa unnið Samfélagsskjöldinn.
Ég er á leiðinni til Manchester í haust á fyrsta leikinn á Old Trafford í rúm 10 ár og hlakka auðvitað til þó að blendnar tilfinningar vegna peninganna sem renna í Glazer vasa geri vart við sig. Það góða er auðvitað að daginn áður á FCUM leik og ég ætla ekki að láta mig vanta á Gigg Lane. Verður fróðlegt að sjá hvað marga úr ferðinni ég get dregið þangað.
Og fyrst ég er að tala um United, það er sama hvað völlurinn verður stór, leikurinn hér að neðan verður ekki sleginn út sem besta stemming nokkru sinni á Old Trafford:

Í þá daga varð maður að láta sér nægja siguröskur morguninn eftir þegar Mogginn var lesinn, ég man enn eftir þeim morgni og man ég þó ekki margt. Ótrúlegt.

Takk Berlín

2007-07-31T18:03:00.000Z

Takk Berlín, skítaveðrið þitt síðustu fjóra daga kom mér gjörsamlega í gírinn fyrir veðrið hér heima. Var orðinn of góðu vanur þessar tvær vikur í Grikklandi. Þegar ég er farinn að segja að það sé eiginlega orðið of heitt, þá er morgunljóst að hitinn er kominn yfir 40 gráðurnar. Mikið rosalega var þetta æðislega frábær ferð.
Fokk. Vinna á morgun.
Og þó. Er eiginlega alveg til í að komast í gírinn aftur.
Myndir síðar.

Skúrkur

2007-07-07T15:19:00.000Z

Ég er skúrkur og skúnkur. Dreg vini mína hingað í Fossvoginn undir því yfirskini að ég sé til í selja hjólið mitt. Og svo þegar verkfræðingnum tekst að nota mína fínu pumpu sem mér hafði aldrei tekist að nota... þá hætti ég við að selja. Af því að nú er hjólið ekki loftlaust lengur.
úff.
Sjáum til hvort ég nota það eitthvað, ef ekki þá sel ég þeim það.
Svo þarf ég að þrífa kjallaratröppurnar. Þvílíkt ógeð.

Glasto

2007-06-22T19:21:00.000Z

Er að horfa á Fratellis beint frá Glastonbury. Snelld, og drullubaðslaust að auki.

Mannvonska

2007-06-20T17:36:00.001Z

Þar sem trúargeðveiki ræður ríkjum fær mannvonskan að leika lausum hala

Anderson og Nani

2007-05-31T07:06:00.000Z

United er víst búið að komast að samkomulagi um að kaupa Anderson frá FC Porto og Nani frá Sporting Lissabon.. Nú veit ég jafnlítið um þessa pilta óg þið, en þetta er syrpa með Anderson. Hann er nítján...

Svolítið snöggur, drengurinn.
Og hér er svo Nani. Hann má alveg taka nokkur heljarstökk á Old Trafford næsta síson.

Vonum þetta gangi allt upp. Eitthvað segir mér að Queiros hafi þó nokkur áhrif á OT þessa dagana! og líka aðdráttarafl, eins og annar Portúgali á staðnum.
PS. Hæ, KR-ingar!

Weetabix FC

2007-05-22T06:45:00.000Z

"When I was in the leverage buy-out business we bought Weetabix and we leveraged it up to make our return. You could say anyone who was eating Weetabix was paying for our purchase of Weetabix. It was just business. It is the same for Liverpool. Revenues come in from whatever source and go out to whatever source and, if there is money left over, it is profit."

Sjá neðst í þessari grein.
Knattspyrnulið eru bara eins og hver önnur fabrikka. Annars er ágætt að líkja Liverpool við Weetabix. Það síðarnefnda er álíka bragðgott og hið fyrrnefnda er skemmtilegt á að líta, þannig að maður snertir á hvorugu.
Hm. kannske á líkingin enn betur við Chelsea, Weetabix nær þó allavega árangri! Sleppum því samt, hér eftir vita lesendur viða hvað átt er þegar Weetabix FC ber á góma.
Annars veit ég ekki hvort er verra. Að gleyma ekki obskúr persónu úr Tinna og spyrja um hana, eða að hafa ekki hugsað um þá sömu persónu í 25 ár, en muna eftir henni þegar nafnið kemur upp. Reyndar var nafnið mjög augljóslega úr íslenskri Tinnaþýðingu sem kom mér á sporið, en það tók mig mínútu að kveikja. Mín afsökun? Leyndardómurinn var önnur af tveimur Tinnabókum sem ég átti. Hinar las ég bara á safninu meðan ég var að bíða eftir að bækurnar sem ég var að fá lánaðar voru stimplaðar út.

Arkibaldur Argvís

2007-05-21T13:38:00.000Z

Var ekki Arkibaldur Argvís veskjasafnari nokkur sem Georges Remi skrifaði um í sögu sinni um Leyndardóm einhyrningsins?
Georges betur þekktur sem Hergé myndi fagna 100 ára afmæli í dag, ef hann hefði lifað.

Sena og tónlist.is, helvítis pakk. Og svo eitthvað annað skemmtilegra.

2007-05-19T08:52:00.000Z

Gleði mín í síðustu færslu var ótímabær. Bent var á í athugasemd að það er Senu að þakka að iTMS er ekki á Íslandi, þar sem Sena neitar að leyfa iTMS að selja þeirra tónlist og iTMS kemur ekki inn á markaði nema geta selt lókal mússík. Sena er hluti af 365 sem og d3, og þetta er því allt sama pakkið. Ég kaupi því ekki minnsta snitti af tonlist.is, því það er þeim að kenna að ég get ekki keypt erlenda tónlist. Rakkarapakk.
En að skemmtilegri hlutum. Bikarúrslitaleikur í dag og við getum hirt okkar fjórðu tvennu (þrennan er talin með). Það yrði yndislegt.
Skemmtum okkur því við að rifja upp næstbesta leikmann sem hefur klæðst rauðu skyrtunni:
.
Svo var ég búinn að lofa að svara henni Freyju:

1. Ferðu eitthvert í sumar?
Já
2. Hvert ferð þú í sumar?
Grikklands (og helgarferð til London reyndar líka
3. Hvað verðurðu lengi?
Tvær vikur
4. hefurðu farið þangað áður?
Já, til Grikklands, en ekki til eyjunnar Εύβοια þar sem ég verð núna.

tonlist.is! Frábært!ekki frábært.

2007-05-15T06:59:00.000Z

Þar til nú hefur þessi færsla verið í fullu gildi (reyndar fóru víst gæðin á einhverjum punkti upp í 192kbps).
En ekki lengur! Skv Mogga í morgun ætlar tonlist.is að taka DRM af skrám sínum!. Þetta eru frábærar fréttir! Nú er hægt að kaupa af þeim lög og *eiga* þau, ekki bara fá þau lánuð með skilyrðum. iPod eigandinn og iTunes eigandinn ég get loksins farið að nota þetta. Skv fréttinni fer þetta í loftið á laugardag, ég mun mæta og kaupa góðan slurk!
Sé að þeir munu bjóða upp á mismunandi form, t.d. bæði aac og mp3. Fróðlegt væri ef maður gæti fengið lag á báðum formum, svona ef maður treystir ekki að maður muni alltaf nota iPod, eða vill geta spilað í ekki-iPod tónhlöðum eða iPod lausum tölvum. Kemur í ljós.
Geri ráð fyrir að þetta verði vatnsmerkt á einhvern hátt þannig að ekki verður áhættulaust að dreifa keyptum lögum áfram, en, það er nú einu sinni ólöglegt ;)
edit: ~~Sem sé frábært!~~. Ekki frábært. tónlist.is sökkar enn! Sjá hér

Evróvision.. ha?

2007-05-12T21:33:00.000Z

Ha?
Jújú, úkraína var allt í lagi, en ég var að fíla Svía, Finna og Frakka. Í þessari röð. Maður getur víst ekki kosið sigurvegara á hverju ári.

Á leið á kjörstað

2007-05-12T10:28:00.000Z

Er á leið á kjörstað og var rétt í þessu að ákveða mig. Það er ágætt. Held ég. Aldrei verið svona óviss um mitt atkvæði, þetta er allt saman pakk.
Plana svo að renna í bæinn og gera eitthvað skemmtilegt.

Kosningar og Heródes who?

2007-05-08T06:21:00.000Z

Tók prófið sem allir eru að tala um:

Stuðningur við Samfylkinguna: 37.5%
Stuðningur við Framsóknarflokk: 30%
Stuðningur við Íslandshreyfinguna: 30%
Stuðningur við Sjálfstæðisflokk: 25%
Stuðningur við Frjálslynda flokkinn: 24%
Stuðningur við Vinstri-Græna: 6.25%

Þabbara þa...
Tók það svo aftur, í þetta skipti herti ég aðeins á skoðunum mínum og varð ákveðnari:

Stuðningur við Samfylkinguna: 62.5%
Stuðningur við Framsóknarflokk: 40%
Stuðningur við Íslandshreyfinguna: 40%
Stuðningur við Sjálfstæðisflokk: 31.25%
Stuðningur við Frjálslynda flokkinn: 28%
Stuðningur við Vinstri-Græna: 12.5%

Þetta getur ekki verið skýrara, eða hvað?? Gleymdu reyndar að spyrja hvort maður treysti liðinu! Þetta er samt skárra en síðast og eitthvað meira afgerandi.
Svo eru þeir búnir að finna gröf eins Heródesanna, Heródesar mikla meira að segja. Og trúarnöttararnir á Moggablogginu míga í sig af hrifningu af þessari staðfestingu á hve Biblían er sönn. Þarf eitthvað að fara náið út í hvað þetta er fjarstæðukennt? Vantrú reynir samt, svona fyrir þá sem ekki hafa nema hálfa hugsun. Svona eins og E***** A******.
Var boðið á krikketæfingu í gær. Þáði með þökkum en svo komst ég ekki á endum. Svolítið súrt.

Meistarar!!

2007-05-06T17:32:00.000Z

Championes!
Championes!
Olé Olé Olé!

We've Got Our Trophy Back!

Mourinho, are ya listening?
You better have our trophy glistening.
We'll come Wednesday,
To take it away.
We're walking in a Fergie wonderland!

Sama þótt leikurinn á miðvikudaginn skipti ekki lengur máli, þá verður óendanlega sætt að sjá Chelsea þurfa að mynda heiðursgöng fyrir okkur. Ég man hvað það var óendanlega sárt fyrir tveim árum. Fagnaðurinn verður tekinn á miðvikudag, með trukki og dýfu.

Tap

2007-05-02T20:54:00.000Z

Það er ömurlegt að tapa ef liðið á það ekki skilið.
Það er enn ömurlegra að tapa ef það er útaf því að liðið gat ekki neitt.
Forza Milan 23 maggio.

Evrópa

2007-05-01T21:24:00.000Z

Chelsea vinnur ekki fjórfalt, það er ágætt.
Verst hvað margir Íslendingar fara af stað á morgun að redda miðum. Ég þarf að bíða fram á fimmtudag, ætla ekki að jinxa neitt með fyrir fram ráðagerðum

Just a perfect day.

2007-04-28T16:29:00.000Z

Einhver svakalegasta sveifluleikur sem ég hef séð. Skömmu eftir hálfleik vorum við undir 2-0 og vorum frekar bitlausir og Chelsea var að vinna Bolton 2-1, örugglega á seiglunni eins og venjulega.
En, football! bloody hell! eins og sörinn sagði 26. maí 1999. 4-2 og 2-2 og við eigum að geta klárað þetta. En ekki er allt búið enn, við vitum það best sjálfir, United menn. En sætur er dagurinn og njótum hans meðan er.
Til að kóróna allt saman þarf 9 marka kraftaverk til að Leeds falli ekki. Því fagna allir sannir United menn!

Stórkostlegt

2007-04-26T06:35:00.001Z

Það er stórkostlegt að 'þjóð'kirkjan hafi ekki samþykkt vígslu samkynhneigðra. Það er jú augljóst að bæði í Gamla testamentinu og í bréfum Páls er blátt bann lagt við kynmökum þeirra. Grænsápan tapaði. Það er því vonandi að augu þeirra sem nú hafa hátt og vilja ganga úr þjóðkirkjunni opnist enn frekar og þau geri sér grein fyrir að Biblían er ekki heilög og ekki sannleikur og að Páll var bara ofskynjunarsjúklíngurinn Sál.
Ef þú gengur úr þjóðkirkjunni af því þú vilt að samkynhneigðir fái að giftast í kirkju, þá ertu að ganga af trúnni og ég hvet þig til að ganga alla leið. Til hamingju!

Stóri græni risinn lætur óánægju sína í ljós

2007-04-25T05:32:00.000Z

Hulk heyra Edward Norton leika Hulk. Hulk ekki ánægður.
Ansi held ég að ég myndi leggja á flótta ef Hulk myndi sýna óánægju í minn garð.
Það kemur ekki á óvart að popúlistaflokkur Íslands vill afnema verðtryggingu. Ég legg til að þeir sem vilji afnema verðtryggingu taki óverðtryggð lán sem allir bankar bjóða upp á, og/eða forðist jafngreiðslulán sem eru helsta ástæða þess að lán 'lækkar ekki'. Jafngreiðslulán til 40 ára þýðir að fyrstu 24 árin eða svo myndast varla nafnverðseign nettó. Ekki koma og kvarta við mig ef þú áttar þig ekki á því áður en þú tekur lán. Eða reyna að skattleggja mig með neikvæðum raunvöxtum. Sem er auðvitað það sem þeir vilja sem vilja banna verðtryggingu, fá gefins peninga.
Veit liðið ekki hvað lífeyrissjóðir eru?
Fólk er fífl.

Frábært, og ekki

2007-04-24T21:11:00.000Z

Frábær sigur hjá United, hefði getað verið miklu verra. Verra hins vegar að Nýsjálendingar skitu alveg á sig, og eru að tapa.
Ég myndi ekki vilja skipta á úrslitum :)

Stikkorðablogg

2007-04-24T05:30:00.000Z

Búinn að vera latur til bloggs og því bíða ýmsar hugsanir. Best að stikkorðablogga og sjá svo til hvort meira verður úr síðar.

Í dag er undanúrslitadagur og ég verð límdur við sjónvarpið. Nýja-Sjáland - Sri Lanka í krikkettinu, loks komið að alvöru leikjum eftir 6 vikna vafstur. Á ég ekki að blogga um það seinna í dag? Það yrði þó allavega úník meðal íslenskra bloggara. Bond, Shane Bond sér um þetta!
Já, og svo er það United - Milan. Ha? Ég? stressaður? neineinei
Auðvitað er Ronaldo besti leikmaður og besti ungi leikmaður í ensku knattspyrnunni!
Talandi um það, afhverju rembast menn við að þýða 'Best Young Player' sem efnilegastur? Fífl.
Og bara af því að sum þessara liða hafa verið að vinna titla er rétt að minna á að 'Glasgow Celtic', 'Glasgow Rangers', 'Inter Milan' og 'AC Mílanó' er allt saman KOLRÖNG nöfn. Svona álíka og Arsenal Lundúnir.
Gen eru ekki til! Þess vegna er Guð til. Brandari dagsins.
Frændi og fjölskylda eru á leiðinni heim! Í Fossvoginn þ.e.a.s. Enn einn Fossvogsbúinn kemur til baka í dalinn og tvö lítil börn eru heimt úr þeirri helju að þurfa að alast upp KR-ingar. Því er mjög fagnað!
Spjallaði við rafvirkjann. Það er komið ár síðan ég talaði fyrst við hann. Nú lítur út fyrir að af þessu verði upp úr miðju maí.
Byggjum aðeins stærri og fallegri hús á horninu á Austurstræti og Lækjargötu. Samt ekki eins stór og Iðuhúsið. OK? Einföld lausn.

Nóg í bili!

Niflungahringurinn

2007-04-15T07:37:00.000Z

Mæli með Niflungahringnum í sjónvarpinu í kvöld. Ágætis útgáfa af ævintýrinu, auðvitað einhver frávik frá sögunni eins og við þekkjum hana best, en fín skemmtun. Drottningin af Íslandi er augnayndi og fær mann til að hafa ekki áhyggjur af því hvernig þetta Ísland er.
Ekki spillir að ég kom á örlítinn hátt að gerð myndarinnar, hjálpaði handritshöfundunum Diane Duane og Peter Morwood með smáatriði, enda kannast ég við þau hjón af Pratchett ráðstefnunum, mesta indælisfólk.

Stórfenglegt

2007-04-10T21:08:00.000Z

Stórfenglegur sigur á Roma í kvöld. Þegar United spilar vel spilar ekkert lið flottari fótbolta. Ég vildi reyndar fá 10 mörk, en það er ekki alltaf allt fengið. Svo var hvert markið öðru fegurra.

Bókastafli

2007-04-07T10:41:00.000Z

Hringadróttinsmaraþonið tókst vel í gær, allt í allt tók þetta frá 8.30 til 10.45. Reyndar með tæpra tveggja tíma pásu í eftirmiddaginn, þannig að 12 tíma planið er nokkuð sólíd.
Hermdi eftir Einari, náði í þær bækur sem ég á ólesnar sem ég tel líklegt að ég lesi. Er búinn að byrja á þessum flestum.

Mest er þetta SF, það er eins og það sé smá þreyta í mér gagnvart þeim núna. En allavega, eigum við ekki að klára eins og helminginn af þessu um páskana? Það væri fínt. En ég þarf líka að horfa á bolta og reyna að læra að spila tölvuleiki í nýja Xboxinu sem ég gaf sjálfum mér í afmælisgjöf.

Á pásu.

2007-04-06T15:35:00.000Z

Gestirnir sem komu kl. 8.30 í morgun eru í fjölskyldukaffi núna og þess vegna er Tveggja turna tal á pause einmitt þegar Jackson ákveður að eyðileggja Faramír sem karakter og láta hann draga Fróða og hringinn til Osgilíað. Þannig að ég fékk tíma til að þvo upp eftir hádegismatinn. Eldhúsið orðið gott fyrir kvöldmatinn, grillaða 'gúru. (tillögur að kryddi á hana vel þegnar, Nanna?)
Meiri háttar dagur, mætti reyndar alveg vera skýjað!

Páskabíó

2007-04-05T20:28:00.000Z

Að gefnu tilefni horfði ég á Life of Brian áðan. Væri reyndar réttara á morgun, en þá er ég upptekinn.
Og hér mætast í einu myndbandi Monty Python, Richard Dawkins og Ted Haggard.

Fyndið? you betcha...

Ekki nógu augljóst...

2007-04-02T16:51:00.001Z

og þar sem síðasta færsla var ekki nógu augljós...
þá á ég afmæli í dag. Húrra fyrir mér.

Lag dagsins

2007-04-02T06:27:00.000Z

La la lala la laa
La la lala la laa
La la lala laaa Bjössi
La la lala la laaaaa

Þori ekki að sýna allan textann af ótta við höfundarréttarbrot. Patty og Mildred gætu orðið fúlar.
Og af því mér sýnist ég halda því til haga hér, þá fékk ég mér ekki kókópöffs í morgunmat, enda í góðu aðhaldi. Spurning kannske um að leyfa sér það um páskana?

Mezzoforte

2007-03-27T22:28:00.000Z

Frábærir tónleikar í kvöld, frábærir listamenn þarna á ferð, pottþétt skemmtun. Hlakka til að sjá DVDinn. Fín pizza á Horninu á eftir. Góður dagur.

Helgarblogg

2007-03-25T08:18:00.000Z

Föstudagurinn var afskaplega góður. Fór eftir vinnu með afmælisgjafir handa frænda, og verð að segja að Víkingstreyjan fer honum vel. Svo var pabbinn ánægður með Arsenal treyjuna, það sem maður gerir ekki fyrir vini sína!
Hafði verið að spá í líta í fimmtugsafmæli matargúrúsins en var svo boðið í mat til vina minna. Big chunks o'meat af grillinu klikkuðu ekki. Síðan var tími á að halda niður í bæ með viðkomu í Fossvoginum að ná í frænda. Síðan var það Apótekið þar sem m.a. var rætt um Hvolsvöll. En lokaáfangastaður var Sálarballið á Nasa og þar var tjúttað fram eftir nóttu. Hápunktur kvöldsins var auðvitað að sjá uppáhaldstrommarann minn performa. Nei, ekki Jóhann...
Miðað við allt var gærdagurinn bara fínn og rólegur, göngutúrinn niður í getraunakaffið í Víkinni í grenjandi slagviðrinu var hressandi.
En núna þarf ég að klára skattinn og svo er tveggja ára afmælisveisla.